Gipahugtan pa ang kampanya sa Police Regional Office-X (PRO-X) batok sa naghitak nga smuggling sa rehiyon. Sa pakighinabi sa Bombo Radyo Malaybalay kang PBGen. Cristopher N. Abrahano, Regional Director sa PRO-X, nga mukabat sa dul-an P30 milyones ang kantidad sa mga smuggled nga sigarilyo ang nasakmit sa mga awtoridad sa mga dagkong highway sa Mindanao.
Matud pa sa opisyal, nagsilbing “transshipment point” ang mga major highways sa rehiyon diin naga-agi ang mga kontrabando gikan sa nagkalain-laing bahin sa Mindanao.
Dugang pa niini, aduna na usab mga estratihiya nga pamaagi ang mga nagpaluyo sa mga iligal nga kalihukan sama sa pagtago sa mga kontabando sa mga garbage truck o di kaha sa mga ambulansya.
Gipahimangnoan usab sa opisyal ang publiko bahin sa nagkalain-laing modus operandi ug estilo sa pagtago sa mga smuggled nga sigarilyo aron lang makalusot sa mga checkpoint.
Busa hugot usab ang kampanya sa pagbawal sa mga tindahan sa mga iligal nga sigarilyo aron mapreserba ang ekonomiya nasud ug aron mapadulong sa gobyerno ang angay nga kita nga iya sa katawhan.