Nasakmit sa mga sakop sa Provincial Highway Patrol Team, Bukidnon ang ubay-ubay nga kahon sa gituohang iligal nga sigarilyo atol sa Anti-Carnapping Operation nga gikasa pasado alas 12:24 sa kaadlawon karong adlawa, sa Barangay San Jose, Malaybalay City, Bukidnon.
Atol sa operasyon, naharang ang usa ka Isuzu ten-wheeler closed-van truck tungod sa initial traffic violation sama sa improvised nga plate number ug depektibong brake lights.
Napakyas sa pagpakita og dokumento ang drayber, hinungdan nga gihimo ang technical inspection ug inventory diin nabalandra ang kapin kon kulang 40 ka kahon sa smuggled nga sigarilyo nga giabana-bananag nagkantidad og kapin P1.6 milyones.
Ang sakyanan gikustodiya na sa Provincial Highway Patrol Group–Bukidnon ug giturn-over sa Bureau of Customs alang sa tukmang disposisyon.
Ang suspek nakakustudiya na sa Malaybalay City Police Station ug mag-atubang sa kasong paglapas sa RA 10643 o Graphic Health Warning Law.