Dul-an usa ka milyon pesos nga kantidad sa iligal nga droga ang nakumpiska sa kapulisan sa managlahing operasyon sa lalawigan sa Bukidnon.
Ang maong datos natala gikan sa Pebrero 23 hangtod Marso 1, ning tuig. Subay sa gipagawas nga report, miabot sa Php 900,910.40 ang kinatibuk-ang kantidad sa 103.075 ka gramo sa shabu ug 1,666.67 ka gramo sa marijuana nga nakumpiska gikan sa 18 ka mga dinakpan sa kampanya batok iligal nga droga.
Gawas sa operasyon sa droga, 95 ka personahe ang kinatibuk-ang nasikop sa 132 ka operasyon nga gipahigayon sa tibuok semana.
Lakip sa mga accomplishment mao ang pagkasikop sa usa ka Most Wanted Person, 16 ka Other Wanted Persons, ug 47 ka mga armas nga nakumpiska gikan sa unom ka suspetsado sa kampanya batok loose firearms.
Gihingusgan usab ang operasyon batok sa smuggling diin 34 ka tawo ang nadakpan sa smuggled cigarettes, samtang 10 usab ang nasikop sa illegal fishing.
Sa laing bahin, upat ka mga indibidwal ang natingkagol sa prisuhan tungod sa illegal logging diin nakuha ang 1,447.64 board feet nga kahoy nga nagkantidad og Php 94,892.00, samtang upat usab ang nadakpan sa illegal gambling.