Gipaniguro sa Bukidnon Police Provincial Office nga andam ang mga personahe sa kapulisan sa tibuok lalawigan sa Bukidnon hilabi na sa opisyal nga pagsugod ang duha ka dagkong kalihokan, ang Kaamulan Festival 2026 ug ang Northern Mindanao Regional Athletic Association 2026.
Matud ni PCol. Oliver Sotto Navales, Provincial Director sa Bukidnon Police Provincial Office, mokabat sa kapin 4,000 ka mga kapulisan ang gipakatap sa nagkadaiyang lugar sa probinsya aron masiguro ang kalinaw, kahapsay, ug kaluwasan sa tanang aktibidad sa maong mga selebrasyon.
Dugang pa niini, nga naka-standby 24/7 ang mga security personnel hilabi na sa mga billeting quarters sa mga delegado sa NMRAA aron masiguro ang kaluwasan.
Gibutyag usab ni PCol Navales, taliwala nga ubos ang kasamtangang crime rate sa Bukidnon, nagpadayon gihapon ang hugot nga pagbantay sa mga pulis aron malikayan ang bisan unsang insidente nga makasamok sa selebrasyon.
Gi-awhag usab niini, ang publiko nga magpabiling alerto, magtinabangay sa mga otoridad, ug magreport gilayon sa bisan unsang kadudahang lihok sa palibot.