Gibanabanang milungtad og kapin o kulang 17 ka oras ang sunog nga nahitabo sa Mt. Palaopao, Sumilao, ning lalawigan, diin gikatahong adunay kapin sa 100 ka ektarya ang gilapdon niini.
Sa eksklusibong pakighinabi sa Bombo Radyo Malaybalay kang SFO3 Astrophel Mulet, Officer-in-Charge sa Municipal Fire Marshal sa Sumilao Fire Station, gipadayag niini nga ang sunog nahitabo kaniadtong Enero 12, 2025 ug gikaingon nga usa ka grass fire.
Matud niini, dako ang kalisdanang naatubang sa pagresponde tungod dili makaabot ang fire truck sa maong lugar gumikan sa kahilitan ug kabukiran sa lugar, nga bisan ang mga motor dili usab makaagi.
Gipadayag usab ni Mulet nga usa sa labing gikabalak-an mao ang mga agricultural farms nga nahimutang sa ubos sa bukid.
Apan, giklaro nga layo ang maong sunog sa mga residential areas, ug dugang pa nga batohon ang Mt. Palaopao, hinungdan nga wala’y naitalang kadaut sa mga kabalayan ug adunay minor damages lamang gawas sa nasunog nga bukid.
Sa karon, usa sa mga gitan-aw nga posibleng hinungdan sa sunog mao ang tinuyo nga pagsiga og kalayo kon kaingin, apan gihingadlan nga wala pa mahuman ang imbestigasyon aron matino ang tinuod nga rason sa insidente.
Gipaniguro usab sa kapulungan sa bombero nga adunay mga forest guard nga nagbantay sa maong lugar aron malikayan ang susamang insidente sa umaabot.