Samdan ang duha ka drayber ug tulo ka pasahero human nagkabangga ang duha ka sakyanan sa Sayre Highway, Barangay Panadtalan, Maramag, Bukidnon, pasado alas 4 sa hapon, niadtong Lunes, Abril 6.
Ang maong aksidente gikalambigitan sa usa ka Toyota Revo nga gimaneho ni alyas Bonifacio, 62 anyos, residente sa San Roque, Maramag, ug ang usa ka Toyota Vios nga gidala ni alyas Roger, 36 anyos, lumulupyo sa North Poblacion sa maong lungsod.
Subay sa report gikan sa Maramag Municipal Police Station, ang duha ka sakyanan managsamang nagbiyahe paingon sa direksyon sa dakbayan sa Valencia.
Pag-abot sa subidahong bahin sa dalan, kalit matud pa nga miliko pasulod sa inner lane ang Toyota Revo, hinungdan sa maong aksidente.
Gisulayan pa og tamak sa brake sa drayber sa Vios ang iyang gimanehoang sakyanana, apan tungod sa kakalit sa panghitabo, wala na kini makontrolar ug nibangga sa wala nga bahin sa Revo.
Tungod sa kakusog sa impak, nakaangkon og mga samad sa lawas ang duha ka drayber lakip na ang tulo ka pasahero sa Vios, diin usa niini menor-de-edad.