Ginaimbestigahan sa Embassy of the Philippines in the United Arab Emirates ang taho nga giingong duha ka Pilipino ang nadakpan sa Dubai gumikan sa giingong pagrekord ug pagpakaylap sa mga video nga may kalabotan sa bag-ohay nga mga pag-atake sa mong nasud nasud.
Sa usa ka pamahayag, sumala sa Philippine Embassy in Abu Dhabi ug sa Philippine Consulate General in Dubai nga nangayo na sila og opisyal nga kumpirmasyon ug dugang nga impormasyon gikan sa mga awtoridad sa United Arab Emirates mahitungod sa pagkaila, kahimtang, ug legal nga sitwasyon sa duha ka Pilipinong nalambigit.
Matud pa sa mga opisyal, gitahod sa Pilipinas ang soberanya sa UAE ug ang pagpatuman niini sa mga balaod may kalabotan sa national security, cybercrime, ug public order.
Kini sunod sa pahimangno sa mga awtoridad sa UAE nga ang pagpakaylap sa sayup o dili beripikadong impormasyon mahitungod sa seguridad mahimong ikonsiderar nga krimen.
Lakip niini ang pagbahagi sa mga video nga nagpakita sa air defense interceptions, pag-atake sa mga landmark, ug bisan pa ang AI-generated nga mga video, nga mahimong adunay silot nga pagkabilanggo ug dako nga multa.
Tungod niini, nanawagan ang mga diplomatikong opisyal sa mga Pilipino nga nagpuyo sa UAE nga mag-amping pag-ayo sa ilang mga kalihokan sa internet.
Gipahimangno usab ang komunidad nga likayan ang pagkuha og video, pag-post sa internet, o pagkomento sa mga dili kumpirmadong isyu sa seguridad, ug sa baylo mosalig lamang sa mga opisyal nga pahayag sa gobyerno sa UAE.
Samtang, base sa mga report, nalakip ang duha ka Pilipino sa 25 ka mga tawo nga giingong nadakpan tungod sa pagpaambit og mga video sa internet may kalabotan sa mga pag-atake.
Lakip niini ang nadakpan nga mga langyaw gikan sa India, Pakistan, ug Bangladesh.