Balhog na karon sa selda sa Valencia City Police Station ang duha ka batan-ong lalaki human kini masikop sa gipahigayon nga drug buy-bust operation sa mga operatiba sa City Drug Enforcement Unit (CDEU) niadtong Lunes sa gabii, Pebrero 16, 2026.
Ang mga dinakpan giila nga nagpanuigon og 24 ug 21 anyos, kinsa pulos walay trabaho ug residente sa Purok 4, Barangay Tugaya sa maong siyudad.
Nahitabo ang operasyon sa maong dapit eksakto sa alas 9:04 sa gabii diin malampusong nakuha gikan sa mga suspetsado ang gituohang shabu nga motimbang og 5.3 gramos.
Sumala sa report sa kapulisan, ang maong gidili nga drugas adunay Standard Drug Price nga mukantidad sa ₱36,040.
Gawas sa shabu, narekober usab sa mga operatiba ang gigamit nga buy-bust money ug uban pang mga ebidensya gikan sa posisyon sa duha ka lalaki.
Kasamtangan, giandam na sa kapulisan ang kasong kalapasan sa Republic Act 9165 o Comprehensive Dangerous Drugs Act of 2002.