Natigayon ang usa ka sunog sa Purok 9, Kimtrust, Barangay Butong, Quezon, Bukidnon kagahapong adlawa.
Sumala sa inisyal nga imbestigasyon, gituohang nagsugod ang kalayo gikan sa welding nga gihimo sa ibabaw nga bahin sa usa ka balay.
Duha ka balay ang hingpit nga nasunog samtang naluwas ang ikatulong balay tungod sa firewall.
Ang kadaot sa kabtangan gibanabana nga mukabat og ₱33,750. Sa pakighinabi sa Bombo Radyo kang Angelo C. Mutia -OIC – Chief of Operations Quezon Fire Station gibutyag niini nga usa ka residente ang napaso sa maong insidente ug gidala dayon sa Quezon Infirmary Hospital alang sa paunang tambal.
Gipasidaan usab sa mga bombero nga sa panahon sa grabeng kainit, daghang posibleng hinungdan sa sunog sama sa depektibong electrical wiring, wala mabantayang pagluto, pag-charge sa cellphone, ug welding nga walay husto nga pag-amping.
Sa pagkakaron, ang mga apektadong pamilya anaa sa pag-atiman sa barangay ug nakadawat na og inisyal nga ayuda samtang nagpadayon ang imbestigasyon.