Naghatud ang DSWD Field Office X og duha ka adlaw nga service caravan sa Sitio Sumalayag, Barangay Halapitan, San Fernando, Bukidnon aron mahatagan og basic social services ang mga Tigwahanon Tribe sa maong lugar.
Bisan pa nga lisod ang pagsulod sa maong komunidad tungod sa hilit, abogon ug batuhong agianan sa Pantaron Mountain Range, wala kini nahimong babag sa mga kawani sa ahensya aron mapaabot ang serbisyong gitagana sa tribo.
Mukabat sa kapin sa 300 ka pamilya ang nakabenepisyo sa kalihokan nga gitumong sa pagpalapad sa access sa serbisyo sa panglawas ug civil documentation.
Lakip usab ang Department of Health, PhilHealth ug Philippine Statistics Authority, naghatag og libreng medical consultation, tambal, bitamina ug registration services ngadto na sa mga lumulupyo sa nasangpit nga mga lugar.
Gitabangan usab sa Initiative for Dialogue and Empowerment through Alternative Legal Services (IDEALS), kauban ang LGU sa San Fernando ug Local Civil Registrar, ang libre nga birth registration sa 96 ka miyembro sa 4Ps.
Samtang giproseso sa PSA ang national ID applications sa mga residente nga wala pa’y opisyal nga ID. Ang Barangay Health Workers ug Local Health Unit nagpatuman og bakuna, nutrisyon monitoring ug paghatag og tambal.
Gi-update usab sa 4Ps workers ang household data ug giapil ang mga mabdos ug kabataan sa First 1,000 Days program.