Landing sa balay-tambalanan ang duha ka biktima human sa sunod-sunod nga insidente sa pagpamusil sa lungsod sa Kibawe ug Pangantucan kagahapong adlawa, Marso 29, 2026.
Sa lungsod sa Kibawe, anaa na sa stable nga kondisyon apan nagpabiling confined sa Bukidnon Provincial Hospital ang usa ka 34-anyos nga lalaki human kini pusila sa wala pa mailhing suspek sa P-1A East Kibawe.
Matud sa imbestigasyon, nahitabo ang pagpamusil takna alas-6:20 sa buntag human ang usa ka panaglalis tungod sa ilimnong makahubog niadtong miaging gabii.
Giingong giadto sa suspek ug sa igsoon niini ang balay sa biktima ug gihagit kini og dula hangtod nga gipusil ang biktima sa iyang wala nga paa gamit ang 9mm nga pistola.
Samtang sa lungsod usab sa Pangantucan, gidala sa Don Carlos Doctors Hospital ang usa ka 60-anyos nga tag-iya og mobile sound system human kini makaangkon og daghang samad-pinusilan sa nagkadaiyang parte sa lawas.
Ang biktima, nga residente sa Quezon, Bukidnon, anaa sa Barangay Bangahan alang sa usa ka disco sa dihang kalit lamang kining gipusil samtang naglakaw paingon sa iyang sakyanan banda alas-4:30 sa kaadlawon. Narekober sa mga otoridad ang duha ka kabhang sa kalibre .45 sa dapit nga nahitaboan.