Gipatuman sugod karong adlawa ang pagsaka sa presyo sa matag tangke sa liquefied petroleum gas (LPG).
Matud ni LPG Marketers’ Association (LPGMA) President Arnel Ty, gihimo sa duha ka hugna ang pagpasaka sa presyo nga mokabat og P10 matag kilo sa LPG aron dili kini kaayo bug-at alang sa mga konsumidor.
Ang unang P5 nga umento sa matag kilo sa LPG epektibo karong Abril 1, diin adunay kinatibuk-ang P55 nga dugang sa matag 11 kg nga regular nga household LPG cylinder.
Inig-abot sa Abril 7, ipatuman ang ikaduhang hugna nga laing P5 o dugang P55 sa matag 11 kg nga tangke.
Ang maong umento giaprobahan na sa Department of Energy (DOE), lakip na ang pamaagi nga hinay-hinay aron dili makalitan ang publiko.
Dugang pa ni Ty, ang Pilipinas nagkuhag suplay sa LPG gikan sa South Korea ug Japan diin adunay mga emergency reserve nga molungtad og 250 ka adlaw.
Sa pagkakaron, gibana-banaang anaa pay 40 ka adlaw nga suplay sa LPG ang nasud.