Gisugdan na sa Department of Trade and Industry (DTI) Bukidnon ang inspeksyon sa mga baligyang Christmas lights sa nagkalain-laing tindahan sa lalawigan aron maprotektahan ang mga konsumante batok sa peligro gikan sa depektibo ug peke nga mga produkto samtang nagkadool ang kapaskohan. Sumala ni Junar Meral, CPD Chief sa DTI-Bukidnon, kabahin kini sa preparasyon sa kapaskohan ug regular nga monitoring sa ahensya aron masiguro nga ang mga ginabaligyang dekorasyon mosunod sa safety standards.
Sa karon, wala pa’y tindahang nasakpan nga nakalapas sa regulasyon, apan kung mapamatud-an nga walay saktong dokumento o peke ang produkto, pagaisyuhan kini og notice o kumpiskahon sa mga baligya. Gidugang ni Meral nga gikinahanglan nga mamalit lamang ang mga konsumante sa kasaligan nga tindahan ug siguruhon nga adunay PS sticker o ICC sticker ang mga paliton nga Christmas lights aron malikayan ang sunog ug uban pang peligro.
Usa usab ka store manager nga si Rosalie Dumagpi ang mipasabot nga ilang ginasiguro ang kalidad ug kaluwasan sa ilang mga produkto aron maprotektahan ang mga konsumante.
Sa laing bahin, gikabalak-an usab sa mga konsumidor ug negosyante sa lalawigan ang posible nga pagsaka sa presyo sa mga panaliton samtang nagkadool ang kalag kalag o Undas, nga giingong tungod sa taas nga demand ug limitadong suplay. Padayon ang pagmonitor sa lokal nga otoridad aron malikayan ang overpricing ug mapanalipdan ang interes sa publiko.