Gipahugtan sa Department of Trade and Industry (DTI) Bukidnon ang pag-monitor sa presyo sa mga nag-unang palaliton sa nagkadaiyang lugar sa probinsya sa Bukidnon aron mapugngan ang posibleng pagsaka sa presyo tungod sa pagmahal sa lana.
Matud ni Junar Merla, Head sa Consumer Protection Desk sa DTI Bukidnon, giawhag nila ang mga Price Coordinating Council sa matag lungsod ug siyudad nga i-activate ang Local Price Coordinating Council aron masubay pag-ayo ang presyo sa mga produkto sa merkado.
Kabahin usab sa ilang estratehiya ang pagpatuman og joint surprise inspection ug price monitoring sa mga tindahan kauban ang Department of Energy ug ubang ahensya sa gobyerno aron masiguro nga walay negosyante nga magpahimulos sa kahimtang.
Nasayran nga sukad misaka ang presyo sa lana sa nasud, adunay na usab mga establisyemento nga gipasakaan og show cause order human misaka ang presyo sa ilang baligya.
Gipadayag kini sa DTI atol sa gipahigayon nga 2026 Kapihan with Retailers, Consumers, and Media subay sa pagsaulog sa World Consumer Rights Day.