Sugdan na sa Department of Social Welfare and Development kon DSWD ang pag-apod-apod og P5,000 nga cash assistance sa mga drayber sa public utility vehicle kon PUV nga apektado sa pagsaka sa presyo sa lana, ugmang adlawa, Marso 17, 2026.
Sumala sa DSWD, ang unang nakadawat sa payout mao ang mga tricycle driver sa Metro Manila.
Mokabat sa 139,000 ka mga tricycle driver sa National Capital Region ang makabenepisyo sa inisyal nga rollout sa gobyerno.
Ang maong pundo gikan sa Assistance to Individuals in Crisis Situation kon AICS program sa DSWD.
Gipasabot sa tigpamaba sa DSWD nga si Assistant Secretary Irene Dumlaon, nga gikonsiderar ang mga drayber nga indibidwal nga nag-atubang og ekonomikanhong kalisud tungod sa padayong pagsaka sa presyo sa lana.