Andam na ang Department of Social Welfare and Development kon DSWD–Region 10 sa pag-atubang sa posibleng epekto sa mga umaabot nga bagyo pinaagi sa preparasyon ug pag-preposition sa mga food packs ug relief goods sa rehiyon.
Sa eksklusibong pakighinabi sa Bombo Radyo Malaybalay kang Shaira Agulan, Information Officer sa Disaster Response Division sa DSWD-Region 10, gipadayag niini nga sa Bukidnon aduna nay 11 ka strategic locations alang sa mga food items, samtang tibuok rehiyon adunay 20 hangtod 21 ka prepositioned sites.
Matud pa ni Agulan, adunay igo nga supply alang sa Region 10, apan nagpadala usab kini og tabang sa ubang rehiyon nga mas apektado sa dala sa bagyong Uwan ug sa mga miaging kalamidad.
Dugang pa niini, nag-request na usab ang DSWD-Region 10 sa Central Office alang sa dugang nga family food packs aron masiguro ang padayon ang serbisyo ug adunay igong suplay sa panahon sa emerhensiya.
Gipasabot niini, nga ang mga prepositioned food packs gitagana alang sa lima ka miyembro matag pamilya sulod sa tulo ka adlaw.
Dugang pa niini nga kung adunay sobra sa lima ang miyembro sa pamilya, hatagan kini og dugang pack ang mga.
Giklaro usab ni Agulan, nga ang DSWD direkta nga musulod sa paghatag og ayuda kung ang usa ka LGU wala’y kapasidad nga motubag dayon sa epekto sa kalamidad.
Gibutyag usab niini, nga adunay standby funds ug prepositioned relief goods nga andam gamiton aron matabangan dayon ang mga pamilya nga maapektuhan sa bisan unsang katalagman.
Apan gipasabot nga ang kabahin sa cash assistance o cash transfer nga alang lamang kini sa mga lugar nga gideklarang ubos sa state of calamity.
Gipasabot usab ni Agulan, nga sa kasamtangan, wala pa’y naitalang insidente o mga pamilya nga apektado sa rehiyon.
Dugang pa niini, nagpabilin nga andam ug operasyonal ang DSWD-Region 10 aron moresponde sa posibleng epekto sa kalamidad, hilabi na kung mosaka ang lebel sa peligro sa mga probinsya sa rehiyon.
Sigon usab niini, nga ang ahensya nagpadayon usab sa pagmonitor ug koordinasyon uban sa mga lokal nga yunit sa kagamhanan aron masiguro nga dali ug hapsay ang pagpanghatag sa ayuda ug serbisyo alang sa mga katawhang mahimong maapektuhan sa mga kalamidad.