Girespeto sa Department of Social Welfare and Development sa Rehiyon 10 (DSWD-10) ang gisugyot ni Senador Erwin Tulfo sa pagpuli sa regular nga binulan nga cash grant alang sa mga benepisyaryo sa Pantawid Pamilyang Pilipino Program (4Ps) og livelihood capital aron magamit sa pagsugod og negosyo.
Apan sa pakighinabi sa Bombo Radyo Malaybalay Oliver Inodeo, tigpamaba sa DSWD-10, miluwat kini nga ang maong suhestyon kinahanglan nga tun-an pag-ayo.
Matud ni Inodeo, nga limitado ang panudlanan sa gobyerno, hiabi na nga sa kasamtangan adunay kapin sa 189,000 ka miyembro sa 4Ps sa rehiyon.
Gisugyot ni Inodeo, nga ang maong rekomendasyon kinahanglan magsugod sa hugot nga research ug assessment, hilabi na nga matag tuig adunay mga kausaban base sa mga monitoring ug evaluation sa programa.
Dugang pa niini, nga suportado sa ahensya ang tanang inisyatibo nga makatabang sa kabus, apan kinahanglan nga siguradohon nga ang maong mga inisyatibo dili mosangko sa kapakyasan sama sa nahitabo sa ubang programa.
Gitumbok usab sa DSWD-10, nga ang bisan unsang kausaban sa porma sa ayuda kinahanglan nga ipatuman pinaagi sa pag-amendar sa balaod nga nagmugna sa 4Ps.