Gibungkag ang usa ka giingong drug den sa Manolo Fortich diin nadakpan ang lima ka suspek atol sa usa ka giusa nga buy-bust operation sa Philippine Drug Enforcement Agency (PDEA) Region 10, Bukidnon Provincial Office, kauban ang PNP Regional Intelligence Unit (RIU), Bukidnon Police Intelligence Team (BUK PIT), ug PNP Manolo Fortich.
Ang operasyon gihimo niadtong alas 6:25 sa gabii sa Purok Centro, Barangay Tankulan, Manolo Fortich, Bukidnon. Narekober sa mga otoridad ang walo ka pakete sa gituohang shabu nga gibanabana nga 11 ka gramo ang timbang, uban ang lain-laing drug paraphernalia ug ang gigamit nga buy-bust money.
Gipangalanan ni PDEA Regional Director Alex M. Tablate ang mga nadakpan nga sila alyas Melody, 24 anyos; alyas Wendel, 29 anyos, alyas Rayban, 20 anyos, alyas Leolan, 24 anyos, all residente sa Barangay Tankulan, ug alyas Maricar, 49 anyos, minyo, ug residente sa Barangay Lingion.
Ang mga suspek mag-atubang sa kasong paglapas sa Republic Act 9165, o ang Comprehensive Dangerous Drugs Act of 2002.
Sa pagkakron padayon ang imbestigasyon samtang anaa na sa kustodiya sa otoridad ang mga nadakpan.