Tingkagol karon sa prisohan ang usa ka lalaki nga nailhan sa alyas “Gab”, 33-anyos, drayber sa X and C Building Construction, human kini gikaingong nasakpan nga nangawat og grabas nga gipanag-iya sa kompanyang gitrabahoan.
Sumala sa imbestigasyon sa kapulisan, personal nga midangop sa Malaybalay City Police Station ang tag-iya sa kompanya nga nailhan sa alyas “Dan,” 35-anyos, nga mao usab ang proprietor sa X and C Building Construction, uban ang suspetsado.
Matud pa sa tag-iya nga personal niini gisusi ang mga grabas sa balay sa suspetsado. Nasayran nga kini gipa-unload gamit ang dump truck sa kompanya, pinasikad sa kumpirmasyon sa usa sa mga trabahante sa nagreklamo sa tag-iya.
Human niini, personal nga giatubang sa tag-iya ang suspetsado sa motor pool sa kompanya ug dayon nangayo og tabang sa mga otoridad sa barangay.
Sa pagkakaron, nagpabilin ang suspetsado sa kustodiya sa Malaybalay City Police Station samtang padayon pa ang pagtino sa eksaktong gidaghanon ug kantidad sa grabas nga tukion pa sa inhenyero sa kompanya.
Kahinumdoman nga nasakpan kini kagahapong adlawa, Nobyembre 8, 2025, pasado alas 6:30 sa gabii.