Naangol ang usa ka 35-anyos nga drayber sa motorsiklo human nabangga sa usa ka awto sa National Highway, Sitio New Bohol, Barangay Canituan, Kalilangan, Bukidnon niadtong Pebrero 17, sa alas 4:30 sa hapon.
Nakaangkon sa samad sa iyang wala nga tiil ang biktima human ang iyang motorsiklo nibangga sa usa ka puti nga awto. Ang drayber sa awto, usa ka 28-anyos ug ang iyang pasahero, 29-anyos, gideklarang luwas ug walay naangkong samad gikan sa insidente.
Sumala sa imbestigasyon sa Kalilangan Municipal Police Station nahitabo ang aksidente sa dulhugon nga bahin sa dalan samtang naglawig ang awto paingon sa Camp Kibaritan. Sa pikas bahin, ang motorsiklo nga padulong sa sentro sa Kalilangan giingong misulay pag-overtake sa usa ka wala mailhing sakyanan, hinungdan nga direktang nabangga kini sa kasugat nga awto.
Daling girespondehan sa mga rescuers sa MDRRMO ang biktima ug gidala sa Bukidnon Provincial Hospital. Gikatakda kining ibalhin sa Camp Evangelista Station Hospital sa Cagayan de Oro City alang sa atensyong medikal
Kasamtangan, ang drayber sa awto ug ang motorsiklo anaa na sa kustodiya sa kapulisan alang sa saktong disposisyon. Samtang ang awto pabilin sa lugar nahitaboan tungod sa pagkaguba niini ug nagpaabot pa nga inspeksyonon sa mekaniko aron madetermina ang kinatibuk-ang danyos.