Nakahiagom og grabeng samad sa agtang ug nagkadaiyang mga kadaot sa lawas ang usa ka drayber sa motorsiklo human kini mibangga sa nag-unang sakyanan pasado alas 12 sa udto karong adlawa, sa Sayre Highway, daplin sa Fortich Street ning dakbayan.
Ang motorsiklo nga gimaneho sa usa ka lalaki nga gitawag sa alyas “Rene.” Ang nakabanggaan niini mao ang usa ka pribadong sakyanan nga pula ang kolor, nga gimaneho sa usa ka police personnel, kauban ang laing usa pa ka pulis.
Matud sa usa ka nakasaksi, nagsubay sa maong highway ang duha ka sakyanan padulong sa parehas nga direksyon. Sa dihang miabot sila sa atbang sa naasoyng lugar, kalit nga misunga ang motorsiklo ngadto sa lane sa sakyanang Vios.
Tungod sa kakusog sa impact, grabe ang kadaot sa duha ka sakyanan, labi na sa motorsiklo.
Ang drayber sa motorsiklo, nga si alyas Rene, nakahiagom ug grabeng samad sa agtang ug daghang bun-og sa lawas. Gidapatan dayon kini ug gidala sa pinakaduol nga balay tambalanan diin siya karon kasamtanagang nagpaalim.
Nasuta sa imbestigasyon nga ang drayber sa motorsiklo lango sa ilimnong makahubog, nga maoy hinungdan sa maong disgrasya.