Gipadayag ni Senador Ping Lacson nga pugad sa mga sindikatong kriminal ang DPWH tungod sa mga maanomalyang proyekto, partikular na sa flood control.
Matud sa Senador, nga nakadawat kini og mga bag-ong impormasyon kabahin sa mga sindikatong operasyon sa pipila ka mga engineering offices sa ahensya sa naglain-laing lugar sa nasud.
Dugang pa sa Senador, nga nalambigit ang pipila ka mga opisyal sa Department of Public Works and Highways ( DPWH) sa mga anomalya kabahin sa flood control projects lakip na ang mga proyekto nga wala nalakip sa opisyal nga report nga gisumite kang Presidente Ferdinand Marcos Jr.
Matud ni Lacson, nga daghang mga anomalya ang gakahitabo hilabi sa mga district engineer nga gamaniobra sa mga proyekto apil usab ang Philippine Contractor Accreditation Board (PCAB).
Una na usab gibutyag sa Senador sa iyang privilege speech, ang anomalya sa flood control projects sa Pampanga, La Union, ug Oriental Mindoro.
Dugang pa niini, ang mga kwestionable nga mga kontrata nga gihatag sa mga fly-by-night nga kontraktor sama sa Darcy and Anna Builders, nga nakadawat og dagkong flood control projects sa Bulacan.
Gipunto usab sa senador, ang mga mambabalaod nga gaduso sa insertions sa national budget alang sa ilang kaugalingong proyekto, nga tungod sa kakulang sa transparency, nagpabiling dili sila matino ug dili makapanubag.
Gibatikos usab niya ang dakong pondo nga gi-allocate sa DPWH sa 2025 General Appropriations Act, nga mas dako pa sa sektor sa edukasyon diin supak sa gisugid sa Konstitusyon.
Gidugang ni Lacson nga naapektuhan ang subsidy sa PhilHealth tungod sa mga realignment sa budget, aron paboran ang mga proyekto sa pipila ka “funder.”
Tungod niini, padayon ang iyang panawagan nga ipatuman ang tibuok nga transparency sa proseso sa budget aron masuta ug makapanubag ang mga mambabalaod nga nalambigit sa mga anomalya ug ghost projects.