Hapit na makasuhan ang mga opisyal sa gobyerno nga nalambigit sa anomalya sa flood control projects sa DPWH 1st District Engineering Office. Kini gipadayag atol sa pagtudlo sa bag-ong mga opisyal sa DPWH sa Malolos, Bulacan.
Matud pa ni Department of Public Works and Highways (DPWH) Sec. Vince Dizon, gamay na lamang ang panahon nga nahibilin sa mga opisyal nga nalambigit sa maong anomalya.
Saysay pa ni Sec. Dizon, ang mga nahisgutang opisyal mao kadtong nagpahimulos ug nagbahin-bahin sa kapin ₱300 bilyon nga pondo sa gobyerno nga gitagana unta alang sa mga flood control projects sa nagkalain-laing lugar sa nasod.
Gipasabot sa kalihim nga dili tugotan sa administrasyon nga mapalusot ang korapsyon ilabi na sa mga proyektong direktang nakaapekto sa kaluwasan sa katawhan.
Padayon usab ang imbestigasyon sa DPWH ug uban pang ahensya sa gobyerno aron maseguro nga mapanubag ang tanang nalambigit sa anomalya.