Mibisita si Department of Transportation (DOTr) Secretary Vivencio “Vince” Dizon sa construction site sa multi-billion-peso Bukidnon Domestic Airport sa Maray-Maray, Don Carlos aron sutaon ang kauswagan sa proyekto nga gipundohan sa gobyerno. Atol sa pag-inspeksyon, gisiguro ni Dizon nga mahuman ang proyekto subay sa kontrata ug nagpahinumdom sa kontraktor sa pagpadali sa mga construction work.
Sa pagkakaron, nahuman na ang 800 metros nga runway ug apron, samtang nagpadayon ang trabaho aron mapalapdan pa ang runway ngadto sa 2 kilometros diin gikatakdang mahuman sunod tuig. Kahinumdoman nga atol sa pagbisita ni Dizon niadtong Abril 28, 2025, gibana-banaang 75% na sa kinatibuk-ang pisikal nga kalamboan sa airport ang nahuman.
Ang padayong mga trabaho naglakip sa pagtukod sa terminal building, box culvert, runway embankment extension, control tower, fire station, ug powerhouse. Nagpadayon usab ang earthworks sa duha ka kilid sa gipalapdan nga runway.
Samtang, ang mga taxiway sa airport sa amihan ug habagatang bahin nahuman na. Miabot sa 154 ka ektarya ang Bukidnon Domestic Airport nga mamahimong makatabang pag-ayo sa pag-uswag sa ekonomiya alang sa rehiyon.