Opisyal nga gilusad sa Department of Labor and Employment (DOLE-X) Bukidnon Provincial Field Office ang “Benteng Bigas” nga programa kagahapong adlawa, Agosto 1, ning tuiga, nga nagtumong sa paghatag og barato nga bugas alang sa mga minimum wage earners sa lalawigan.
Sa kasamtangan, adunay inisyal nga 500 ka miyembro sa Bukidnon Planters Service Cooperative (BPSC) ang makapahimulos sa programa.
Ang unang distribusyon gipahigayon sa BPSC Valencia City ug BPSC Pangantucan, nga nagtimaan sa pagsugod sa usa ka inisyatibo nga gitumong aron mapagaan ang pinansyal nga kalisod sa mga trabahante taliwala sa pagsaka sa presyo sa mga palaliton.
Ilawom sa maong programa, ang kwalipikadong benepisyaryo makapalit og hangtod 10 ka kilo nga bugas matag buwan sa presyo nga P20 kada kilo diin mas ubos tandi sa kasamtangang presyo sa merkado.
Gikatakda nga mapalapdan ang programa sa umaabot nga mga bulan, uban sa plano nga iapil pa ang dugang nga mga benepisyaryo ug kooperatiba sa tibuok lalawigan sa Bukidnon.