Gipasalig ni Department of Labor and Employment (DOLE) Secretary Bienvenido Laguesma nga ipadayon sa ilang ahensya ang mga programa nga nagtinguha sa pagtabang ug paghatag og panginabuhian sa mga Pilipino, labi na kadtong anaa sa laylayan sa katilingban o mga marginalized sectors.
Matud ni Laguesma, kini nga paningkamot usa ka direktang pagtuman sa mando ni Presidente Ferdinand Marcos Jr. nga palig-onon ang mga employment programs aron suportahan ang panginahanglan sa trabaho sa tibuok nasud, ilabina sa mga lugar nga kulang sa oportunidad.
Dugang pa, lakip sa mga programang padayong ipatuman sa DOLE mao ang “Tulong Panghanapbuhay sa Ating Disadvantaged” o Displaced Workers kon (TUPAD), nga usa ka emergency employment program alang sa mga trabahanteng nawad-an og trabaho o kabahin sa informal sector.
Apil usab ang Government Internship Program (GIP) nga nagtanyag og experience sa mga bag-ong graduate sa trabahoan sa gobyerno, ug ang Special Program for the Employment of Students (SPES) nga nagtabang sa mga estudyante nga nanginahanglan og pinansyal nga suporta samtang nag-eskwela.
Gidugang pa ni Laguesma nga magpadayon ang ilang kooperasyon sa mga lokal nga panggamhanan ug pribadong sektor aron mapalapad ang abot sa maong mga programa ug mas daghan pa ang matabangan nga mga Pilipino.