Gipasalig sa Department of Labor and Employment (DOLE)-Region 10 ang ilang kaandam sa paghatag og tabang alang sa mga empleyado nga posibleng mawad-an og trabaho tungod sa padayon nga pagsaka sa presyo sa lana sa Northern Mindanao.
Sa pakighinabi sa Bombo Radyo Malaybalay kay Technical Director Atheneus “JV” A. Vasallo, padayon ang ilang pakig-alayon sa Department of Migrant Workers (DMW) aron makuha ang listahan sa mga repatriated OFWs nga nagkinahanglan og suporta, bisan pa man kon wala pa sila’y nadawat nga opisyal nga datos sa pagkakaron. Gipahayag usab ni Vasallo nga andam ang DOLE sa pagpatuman sa programang TUPAD (Tulong Panghanapbuhay sa ating Disadvantaged/Displaced Workers) alang sa mga drayber sa bus ug uban pang sektor nga ma-displace tungod sa taas nga gasto sa operasyon sa transportasyon.
ipadayag sa opisyal nga prayoridad sa ahensya ang job preservation o ang pagpreserba sa mga trabaho. Imbes nga daling magpatuman og retrenchment o pagtangtang sa mga empleyado, giawhag ang mga kompanya sa pagsagop sa mga flexible work arrangements sama sa compressed work week, reduction of workdays, ug temporary suspension of work.
Nanawagan ang DOLE sa mga tagdumala sa kompanya ug sa mga mamumuo nga magtinabangay ug mangita og paagi aron malikayan ang pagkawala sa trabaho taliwala sa hagit nga dala sa krisis sa petrolyo.