Usa ka 45-anyos nga Emergency Room physician sa Fairborn, Ohio ang opisyal nga giila sa Guinness World Records human kini malampusong gipasulod ang 91 ka piraso nga palito sa iyang ilong.
Nalabwan ni Dr. Scott Koncal ang miaging rekord nga 81 ka palito nga natala sa usa ka Swedish national niadtong Agosto 2025.
Makalingaw ug medyo kahibulungan ang nahitabo tungod kay sa iyang 16 ka tuig nga kasinatian isip ER doctor, naanad siya sa pagtangtang sa mga butang nga aksidenteng masulod sa lawas sa pasyente, apan niadtong Disyembre 2025 siya mismo ang boluntaryong nagpasulod og foreign objects sa iyang ilong aron makab-ot ang dugay na niyang pangandoy nga world record.
Mikabat og halos 15 minutos ang pagbutang niya sa mga palito, nga gisaksihan ug gitabangan pa sa iyang mga kauban sa ospital lakip ang usa ka nurse ug medical student.
Matud pa sa doktor, dili kinahanglan ipasulod og lawom ang mga palito aron magpabilin kini sa sulod, ug iyang gipatin-aw nga hinay-hinay nga mubinat ang buho sa ilong sulod sa pipila ka minuto mao nga mas daghan pa siyang nadugang nga palito.