Nanghinaot si Department of Energy kon DOE Secretary Sharon Garin nga magamit sa labing daling panahon ang Malampaya East-1 kon MAE-1 aron makatabang sa nagkagrabeng krisis sa lana sa nasud.
Sa pakighinabi sa Bombo Radyo kang Sec. Garin, kalabot sa posibilidad nga magamit gilayon ang bag-ong nadiskobrehan nga gas reserve kung molungtad pa og pipila ka bulan ang gubat sa Middle East.
Nagkanayon nga Secretary, nanghinaot kini nga mahimo kini sa gobyerno ug pribadong mga investors hilabi na nga maayo ang pag-uswag sa halapad nga eksplorasyon ug pagpalambo sa Malampaya Gas Field.
Gipasabot ni Garin, nga ang Malampaya nagsilbing proteksyon sa industriya sa lana sa Pilipinas tungod aduna na kini mga lokal nga reserba ug dili na kinahanglan nga mag-import gikan sa mga oil producing countries.
Hinuon, giklaro niini nga dili pa sigurado kung mohaum ba kini sa energy mix sa nasud tungod kinahanglan pa nga sulbaron ang tanang teknikal nga isyu kalabot niini.
Bisan pa niini, gikataho nga ang gobyerno nakigkoordina sa mga investor sa maong gas field aron tun-an kung mahimo bang mapadali ang proseso aron hingpit nga magamit ang bag-ong nadiskobrehan nga mga reserba.
Kaniadtong Enero 19, 2026, gipahibalo ni Presidente Ferdinand Marcos Jr. ang pagkadiskubre sa hangtod sa 98 bilyon cubic feet sa natural nga gas sa lugar.
Sukad kaniadto, gihingusgan pa sa Armed Forces of the Philippines ang pagpaniid niini hilabi na duol kini sa mga teritoryo sa Pilipinas nga giangkon sa China.
Ang Malampaya East-1 nahimutang lima ka kilometro sa silangan sa Malampaya Gas Field.