Gikumpirma sa abogado sa kontrobersyal nga direktor nga si Darryl Yap nga nagduso kini og “not guilty plea” sa kasong cyberlibel nga gipasaka sa Muntinlupa Regional Trial Court Branch 203 batok kaniya sa aktor ug host nga si Vic Sotto.
Matud ni Atty. Raymond Fortun, ang legal counsel ni Yap, nga ang sunod nga pagdungog sa maong kaso ipahigayon karong Agosto 19.
Ang hinungdang sa kaso mahitungod kini sa pagpasalida ang usa ka film teaser nga nag-uluhan og “The Rapist of Pepsi Paloma” niadtong Enero 1 ning tuiga.
Sa maong trailer, giingon nga napangalanan si Vic Sotto isip giingong nagbuhat sa pagpanglugos kang Paloma. Hingpit nga gihimakak kini sa kampo ni Vic Sotto ug mipasaka og kaso batok kang Yap.
Gipasakaan si Yap sa kaso nga libel ubos sa Article 353 ug 355 sa Revised Penal Code, nga giamendahan ug anaay kalabotan sa Cybercrime Prevention Act of 2012.