Labing gikalipay ug gipasigarbo sa aktres nga si Dimples Romana ang kamagulangang babaye nga anak niini nga si Christiana Amanda Lauren “Callie” Romana Ahmee tungod sa unang adlaw niini sa trabaho isip piloto.
Human sa daghang katuig sa pagtuon ug pagbansay sa aviation sa gawas sa nasud ug pagkab-ot sa ommercial pilot license, pormal nang misul-ob og uniporme si Callie ug misugod sa karera sa industriya sa aviation.
Sa mensahe sa social media, gipadayag ni Dimples ang dakong garbo sa pagkakita sa paglambo sa anak gikan sa usa ka hilom ug ulawon nga bata ngadto sa usa ka lig-on ug masaligon nga batan-ong babaye nga nakasulod sa usa ka propesyon nga kasagaran ginadomina sa kalalakin-an.
Matud pa sa aktres, ang kalampusan ni Callie resulta sa determinasyon, disiplina, ug pagkamapaubsanon, ug usa ka pagdungog sa mga ampo nga labing gipasalamatan isip pamilya samtang nagpadayon ang bug-os nga suporta sa bag-ong hugna sa kinabuhi sa anak nga si Callie.