Gipahingusgan ni Pope Leo XIV niadtong Dominggo sa iyang wali sa Palm Sunday nga ang Diyos “dili maminaw sa pag-ampo niadtong mga nagpasiugda og gubat” samtang nagpadayon ang grabeng kagubot sa Middle East.
“Mao kini ang atong Diyos… usa ka Diyos nga nagsalikway sa gubat… kinsa dili maminaw sa pag-ampo niadtong mga nagpasiugda og gubat,” sumala pa sa Santo Papa.
Human sa pag-ampo sa Angelus, naghatag usab siya og pasidungog sa mga Kristiyanos sa Middle East nga nag-antos sa epekto sa maong duguong panagbangi, diin daghan kanila ang dili na gani makahimo sa pagsaulog sa mga ritos sa Balaang Simana.
Sayo niining semanaha, nanawagan na ang Santo Papa og ceasefire sa gubat sa Middle East, human kapin sa usa ka milyon ka tawo ang napugos sa pagbiya sa ilang mga panimalay. Giawhag niya ang mga kampong nag-away nga mobalik sa panagsultigay o dialogue.
Si Leo XIV, ang labing unang Amerikano nga Santo Papa, makanunayon nga nagkondenar sa gubat apan nagpabiling mabinantayon sa iyang mga pamahayag sukad nagsugod ang pagpangatake sa US ug Israel sa Iran niadtong Pebrero 28.