Mitumaw ang usa ka dili maayong tilimad-on atol sa sagradong ritwal sa pagbukas sa Kaamulan Festival 2026 sa Bukidnon.
Sa eksklusibong pakighinabi sa Bombo Radyo Malaybalay kang Datu Amay Iwag Linsahay, Municipal Chieftain sa Talaandig Tribe sa Manolo Fortich, gibutyag niini ang maong dili maayong timailhan samtang nagpadayon ang pangampo, hinungdan sa kabalaka sa pipila ka myembro sa tribu.
Apan gilayon kining gitubag ug nasulbad pinaagi sa panaghiusa sa mga Datu, Bae, ug Baylan nga mipadayon sa ritwal aron masiguro ang kalinaw ug kaayohan sa tibuok selebrasyon.
Taliwala niini, gipadayon ang “Pamukalag Ha Pangampo” nga gipangulohan sa mga Datu, Bae, Baylan ug mga opisyalis sa gobyerno sa Bukidnon.
Sumala usab ni Datu Imbagtu Gintumowan Balirio Lastino Jr., ritualist sa tribu Tigwahanon sa San Fernando, ang ritwal gitumong sa pagsampit sa Magbabaya, mga Katigulangan, Apo, ug sa Ginoo aron giyahan ug panalipdan ang maong kalihukan.
Lakip sa ritwal ang paghalad sa manok ug baboy isip simbolo sa pag-ampo, pasalamat, ug pagpanalipod sa komunidad batok sa dili maayong panghitabo.
Ang Kaamulan Festival 2026, naghiusa sa pito ka lumad nga tribu sa Bukidnon nga mao ang Bukidnon, Higaonon, Talaandig, Manobo, Matigsalug, Tigwahanon, ug Umayamnon, nga nagtapok sa sentro sa probinsya aron ipakita ang ilang kultura, tradisyon, ug panaghiusa.