Giila sa Guinness World Records ang usa ka British artist ug die-hard fan sa Spice Girls ang human miabot sa 5,000 ka piraso ang iyang koleksyon sa memorabilia sa sikat nga British girl group.
Si Liz West, nga unang narekord sa Guinness kaniadtong 2011 gumikan sa iyang 2,066 ka memorabilia items, karon opisyal nga giila isip tag-iya sa “largest collection of Spice Girls memorabilia”.
Ang recount o pagbalik sa pag-ihap sa koleksyon niini gihimo isip kabahin sa 70th anniversary sa Guinness World Records.
Gikaingon nga nagsugod ang iyang pagkahilig sa Spice Girls niadtong 1996 pa, samtang anaa pa kini sa edad nga 11-anyos.
Ang iyang koleksyon nagsugod lang sa mga simpleng Christmas gifts, hangtod sa mga talagsaon nga items sama sa mga costume nga gisul-ob sa grupo sa ilang mga concert ug music video.
Lakip sa pinakamaanyag nga piraso sa koleksyon niini mao ang usa ka sinina nga gisul-ob ni Melanie C, nga kapin sa 80 ka designer outfits, ug ang iconic nga Union Jack boots ni Geri Halliwell.
Matud ni West, ang iyang koleksyon labaw pa sa usa ka hobby.
Nahimo kini nga dalan aron ipakita niya ang iyang artistic talent sa lain-laing exhibits sa tibuok U.K., ug dakong tabang usab kini sa iyang karera isip usa ka full-time artist.
Ang iyang dedikasyon usa ka buhing ebidensya sa padayon nga impluwensya sa Spice Girls sa pop culture, bisan pa halos 30 ka tuig na sukad sila misikat.