Gibalewala sa Department of Foreign Affairs (DFA) ang usa ka dokumento nga gipakaylap sa Chinese Embassy sa social media nga nagtinguha unta sa pagpamatuod sa pag-angkon sa Beijing sa Bajo de Masinloc.
Gihimakak ni DFA Maritime Affairs spokesman Rogelio Villanueva ang giingong suwat niadtong 1990 nga gikan sa usa ka Pilipinong diplomatiko sa Germany paingon sa usa ka radio operator.
Sumala ni Villanueva, walay bili ang maong dokumento ilabi na nga gikan kini sa mga partido nga adunay kaugalingong interes ug tuyo nga lubagon ang kamatuoran.
Tungod niini, gihagit sa DFA ang China nga kung duna gyud kini salig sa ilang mga ebidensya, angay kini nilang isumite sa hustong international legal procedures ug mga legal nga korte, imbes nga iagi lang kini sa pag-post sa internet o social media.