Gihulagway ni Senate President Vicente “Tito” Sotto III nga usa ka matang sa “judicial overreach” o pagpangilabot sa gahum sa Kongreso ang bag-ong desisyon sa Korte Suprema kalabot sa impeachment complaint batok kang Bise Presidente Sara Duterte. Matod ni Sotto, ang Kongreso lamang ang adunay eksklusibong gahum kon bahin sa impeachment proceedings base sa Konstitusyon.
Kini human gipahayag ni Supreme Court Spokesperson Camille Sue Mae Ting ang desisyon sa korte nga nagbasura sa reklamo batok sa Bise Presidente tungod sa paglapas sa “one-year bar rule.” Bisan pa niini, gipasabot ni House Justice Committee Chair Gerville Luistro nga padayon gihapon ang paglihok sa mga reklamo batok kang Presidente Ferdinand Marcos Jr. tungod kay managlahi ang ilang legal nga sitwasyon.
Sa laing bahin, giinsistir ni House Deputy Minority Leader Leila de Lima nga teknikalidad lang ang rason sa SC ruling ug wala kini nag-absuwelto sa Bise Presidente sa mga alegasyon bahin sa paggamit sa confidential funds. Tungod sa maong desisyon, mibutho ang nagkadaiyang reaksyon gikan sa mga magbabalaod kon hangtod asa kutob ang gahum sa korte sa pagpanghilabot sa proseso sa lehislatura.