Gitutokan karon sa Department of Trade and Industry kon DTI–Bukidnon ang pagpalig-on sa mga lakang alang sa pagpanalipod sa mga konsumidor sa tibuok lalawigan.
Sa eksklusibong pakighinabi sa Bombo Radyo Malaybalay kang Junar Merla, Chief of the Consumer Protection Division sa DTI–Bukidnon, gipadayag niini nga gipakusog sa ahensya ang pagmonitor sa mga presyo sa basic ug prime commodities aron mapugngan ang dili makatarunganong pagsaka sa presyo ug masiguro ang kalidad sa mga produkto.
Lakip usab sa prayoridad ang pagsiguro nga ang mga produktong gipamaligya sa publiko luwas ug nakasunod sa sumbanan, pinaagi sa pag-verify sa mga certified products ug pagdakop sa mga baligyang dili otorisado o walay hustong sertipikasyon.
Dugang pa niini, nga nagpadayon usab ang DTI–Bukidnon sa consumer education programs aron mapalapdan ang kahibalo sa mga konsumidor sa mga katungod, responsibilidad, ug mga pamaagi sa pag-ila sa luwas ug kalidad nga produkto, isip kabahin sa paningkamot sa ahensya nga mapalig-on ang proteksyon sa publiko ug masiguro ang patas ug hapsay nga pamaligya sa lalawigan.