Sayo nga midangat ang mga atleta gikan sa probinsya sa Misamis Occidental dinhi sa dakbayan sa Malaybalay aron sugdan ang ilang hugot nga pagpangandam alang sa umaabot nga kompetisyon sa athletics ug boxing. Tumong sa delegasyon nga mas mapalig-on ang kondisyon sa ilang mga players pinaagi sa pagpaanad sa bugnaw nga klima sa Bukidnon sa dili pa ang aktuwal nga dula.
Sa exsclusibong pakighinabi sa Bombo Radyo kay Jose Lorenzo Masas, athletic trainer sa Misamis Occidental Trackers, nga anaa na sa 95 porsyento ang ilang preparasyon diin kapin sa 60 ka mga atleta gikan sa elementarya ug sekondarya ang ilang gidala aron mapalig-on ang endurance sa team.
Usa sa mga determinado nga makakuha og bulawan mao ang track and field athlete nga si Veinz Jaime Esolana gikan sa Panaon kinsa anaa na sa iyang katapusang tuig sa sekondarya ug tinguha nga malabwan ang iyang ika-lima nga pwesto sa miaging tuig didto sa Ilocos.
Dungan niini, miabot usab ang boxing team sa probinsya nga gilangkuban sa napulo ka mga boksingero ubos sa paggiya ni Coach Sunnyboy Lambojon Ibarra gikan sa Sinonoc National High School. Matud ni Ibarra, importante ang sayo nga pag-abot tungod kay usa ka combat sport ang boxing ug gikinahanglan ang saktong kondisyon sa lawas aron makasugakod sa mga lig-on nga delegasyon gikan sa Bukidnon, Cagayan de Oro ug Iligan.
Bisan pa man sa ilang hugot nga training matag buntag ug hapon, wala gihapon gakalimtan sa mga atleta ang ilang pagtungha pinaagi sa modular system sa pagtuon samtang nagpaabot sa ilang training schedule sa oval sa sports complex karong umaabot nga Lunes. Mapasalamaton ang tibuok delegasyon sa mainitong pagdawat sa mga lumulupyo sa Linabo ug Aglayan sa ilang billeting quarters ingon man sa limpyo nga pasilidad nga gihatag sa host province nga dako og tabang sa sa mga atleta.