Gipanganlan sa International Criminal Court kon ICC sila Senador Ronald “Bato” dela Rosa ug Senador Christopher Lawrence “Bong” Go isip lakip sa mga co-perpetrators sa kasong adunay kalambigitan sa kampanya kontra droga ni kanhi Presidente Rodrigo Duterte.
Base sa gipagawas nga Document Containing the Charges kon DCC kaniadtong Pebrero 13, 2026, si Duterte giila nga indirect nga co-perpetrator ubos sa Article 25 (3)(a) sa Rome Statute alang sa mga krimen batok sa katawhan, partikular sa murder ug attempted murder.
Nakabutang sa dokumento nga ang mga pagpamatay nahitabo gikan sa 2011 hangtod 2019, lakip na ang mga insidente sa Davao City nga gipasangil sa Davao Death Squad, ug mga operasyon ubos sa “war on drugs” sa panahon sa administrasyon ni Duterte.
Sumala sa ICC, ang pagkalakip nila ni dela Rosa ug Go sa listahan tungod sa tahas niini sa pagpatuman ug pagsuporta sa mga polisiya sa drug war.
Lakip usab sa mga gipanganlan nga mga opisyal ang pipila ka mga kanhi sakop sa gabinete ug mga law enforcement agencies nga direktang nalambigit sa operasyon, sama nila Ronald “Bato” Dela Rosa, Vicente Danao, Camilo Cascolan, Oscar Albayalde, Christopher Lawrence “Bong” Go, Dante Gierran, Isidto Lapeña, Vitaliano Aguirre II, ug ubang Philippine National Police ug mga dagkong opisyal sa gobyerno.
Sa pagkakaron, gitakdang tun-an sa Pre-Trial Chamber ang mga ebidensya aron matino kung ipadayon ang padungog.
Gipasiugda sa ICC nga ang pagpagawas sa dokumento kabahin sa transparency ug pagpakita sa gidak-on sa responsibilidad sa gitawag nga “war on drugs” sa Pilipinas.
Padayon nga ginahulat sa Bombo Radyo ang mahimong mga tubag niini sa mga gipanganlang indibidwal kabahin sa maong hisgutan.