Nagpagawas og opisyal nga pahayag si Atty. Michael Poa, tigpamaba sa defense team ni Sara Duterte, may kalabotan sa ika-upat nga impeachment complaint nga gisang-at batok sa bise presidente.
Sumala ni Poa, ang sunod-sunod nga pagsang-at og reklamo dili pasabot nga tinuod na dayon ang mga alegasyon, ug sama sa mga nauna nga kaso, atubangon nila kini sa hustong panahon ug subay sa Konstitusyon ug sa naglungtad nga mga balaod.
Dugang pa ni Poa, ang balik-balik nga pagsang-at og reklamo wala nagpasabot sa mga alegasyon nga mahimong kamatuoran.
Ang ika-upat nga reklamo gisang-at niadtong Miyerkules ni Atty. Nathaniel Cabrera gikan sa Batangas ug giendorso nila Deputy Speaker Paolo Ortega ug Rep. Bienvenido Abante.
Sa reklamo, gilista ang giingong betrayal of public trust, culpable violation of the Constitution, ug sayop nga paggamit sa pondo, lakip ang uban pang alegasyon.
Namatikdan nga gisumite ang reklamo sa maong adlaw usab diin gi-anunsyo ni Vice President Duterte ang iyang plano nga modagan isip presidente sa 2028 elections, nga nagpasaka pa sa tensiyon sa politika.
Bisan pa sa mga reklamo, nagpabilin nga kusog ang ngalan ni Duterte isip usa sa mga posible nga frontrunners sa umaabot nga eleksyon.
Gibarugan sa defense team nga ang impeachment dili kinahanglan gamiton isip instrumento sa politika, kondili usa ka constitutional mechanism nga kinahanglan ipailalom sa patas ug makatarunganong proseso.