Andam na ang defense team ni Bise Presidente Sara Duterte alang sa pagpanalipod niini sa impeachment case.Gipagawas sa grupo sa depensa ni Duterte ang ilang pamahayag human sa kritisismo nga nadawat sa Senado gikan sa mga legal eksperts, mga miyembro sa akademya, ug uban pang grupo tungod sa pagka-langan sa pagsugod sa impeachment trial.
Sumala sa defense team, dako ang ilang pagtuo nga ang pagsugod sa proseso sa impeachment ilabi na ang ika-upat nga reklamo aduna’y mga seryosong kakulangan base sa Konstitusyon.Gipadayag sab nila nga ang impeachment dili unta gamiton nga armas aron sa pagpakyas, pagpahilom, o pagpahawa sa mga kontra sa politika.
Andam usab ang kampo ni VP Sara nga atubangon ang mga kaso ug ipakita nga walay igong basehan ang mga akusasyon batok sa Bise Presidente.
Sa laing bahin, gisulti na daan ni VP Duterte nga ilang kuwestyunon ang pagtahak sa impeachment case gikan sa 19th Congress padulong sa 20th Congress tungod kay lahi na ang mga miyembro sa sunod nga Kongreso.