Gipanghimakak ni Mamamayang Liberal (ML) Party-list Rep. Leila de Lima ang mga pagkumpara tali sa iyang mga pag-absent sa Senado kaniadto ug sa sitwasyon karon ni Senador Ronald “Bato” dela Rosa, kinsa wala na makita sa mga sesyon sukad Nobyembre 11.
Matud ni De Lima, dili makiangayon ang pagkumpara kaniya o kang kanhi Senador Antonio Trillanes IV ngadto kang Dela Rosa tungod kay ang ilang dili pagtambong sa mga sesyon kaniadto “involuntary” o dili nila gusto.
Gipasabut niya nga napugos siya nga dili makatambong tungod kay gipriso siya base sa mga giingong “hinimo-himo” nga kaso sa administrasyong Duterte. Sa pikas bahin, giingon ni De Lima nga si Dela Rosa karon naglikay o “nagdagan” gikan sa posibleng pagdakop kaniya sa International Criminal Court (ICC) may kalabutan sa gyera batok sa ilegal nga droga.
Gidugang pa sa kanhi senadora nga bisan og napriso siya, padayon gihapon siyang nagtrabaho pinaagi sa pagpasa og mga balaodnon. Nihangyo pa gani siya kaniadto nga moapil sa online sessions atol sa pandemic apan wala kini gitugot sa kadaghanan sa mga senador.
Nanawagan si De Lima sa liderato sa Senado nga dili siya gamitong rason o “scapegoat” sa ilang kapakyasan sa pagdisiplina sa usa ka “delinquent” o sutil nga senador.