Nagbilin og dakong pagmahay sa usa ka dalaga nga giilang si “Steffi” ang tinguha nga makab-ot ang trending nga “glass skin” look human nasunog ug nanghubag ang nawong niini tungod sa paggamit og face serum nga nagkantidad lang og P300.
Sa unang gamit pa lang sa maong produkto nga gipalit online, nakasinati na si Steffi og grabeng pagpula ug kainit sa panit.
Paglabay sa pipila ka adlaw, misamot ang kondisyon diin gawas sa paghubag, nanggula na usab ang mga nana sa nawong niini.
Matod sa biktima, dili na kini makatulog sa grabeng katol ug hapdos, ug nalisdan na gani kini sa pagbuka sa baba.
Kini nga hitabo nagsilbing seryosong pahimatngon sa publiko nga mag-amping sa pagpalit og mga beauty products sa internet.
Tambag sa mga eksperto, siguraduhon nga aprobado sa FDA ang produkto ug kanunay maghimo og “patch test” una kini itapak sa tibuok nawong aron malikayan ang susamang disgrasya.