Daghang mga airlines sa Asya ang hugot nga nagpatuman sa pagmonitor sa kahimsog pagkahuman sa pagkaylap sa virus sa Nipah sa West Bengal.
Gikatahong adunay lima ka mga health worker sa West Bengal ang gikaingong nga natakadan sa virus sa bag-ohay nga mga semana ug anaa sa kritikal nga kahimtang.
Samtang adunay 110 ka mga tao nga nakontak kanila ang anaa sa quarantine.
Ang virus gikaingon nga makahimo sa pagkaylap gikan sa mga binuhing mananap ngadto sa mga tao nga adunay taas nga rate sa pagkamatay nga muabot sa 40 porsyento hangtod 75 porsyento ug wala pa’y tambal o bakuna alang niini.
Tungod niini, gipahugtan sa Thailand ang mga pagsumbanan niini, nga adunay mga screening nga gihimo sa tulo sa mga tugpahanan niini, hilabi na sa mga gikan sa India.
Lakip na ang Nepal sa nagpatuman og hugot nga pagsusi sa mga nangabot sa airport sa Kathmandu ug pipila sa mga land border niini sa India.