Gibutyag ni Mary Grace Santa Elena tigpamaba sa DA-10 , nga bastante o maayong kahimtang sa pagkakaron ang produksyon sa humay sa Northern Mindanao o Region 10.
Dugang pa niini, nga ang rehiyon adunay mga 86% lamang nga rice sufficiency level gumikan dili tanan nga probinsya nag-una sa produksyon sa humay.
Gipasabot usab nga ang ubang probinsya sama sa Camiguin adunay gamay lamang nga yutang gigamit alang sa rice production.
Sa laing bahin, ang Bukidnon nagpabiling nag-unang tigproduce s sa humay sa rehiyon ug giila isip food basket sa bugas sa Northern Mindanao.
Nagpadayon usab ang Department of Agriculture (DA) Region 10 sa paghatag og suporta sa mga mag-uuma sa Northern Mindanao taliwala sa pagsaka sa presyo sa krudo nga nakaapekto sa ilang gasto sa produksyon.
Sa pagkakaron, gamay pa lamang ang pagtaas sa presyo sa pipila ka mga produkto, apan posible kini nga mosaka pa kung magpadayon ang pagsaka sa presyo sa petrolyo.
Nagplano usab ang ahensya sa fuel subsidy program alang sa mga mag-uuma aron matabangan ang ilang gasto sa transportasyon ug produksyon, samtang nagpadayon ang koordinasyon sa mga LGU ug Municipal Agriculture Offices alang sa logistical support.
Dugang pa niini, tabangan sa Agribusiness and Marketing Assistance Division (AMAD) ang mga mag-uuma pinaagi sa pag-link sa ilang mga produkto sa merkado aron malikayan ang mga middlemen ug mapadali ang pagbaligya pinaagi sa Kadiwa Centers sa lain-laing lungsod.
Nagpadayon usab ang ahensya sa pagpatuman sa Farm-to-Market Road Development Program, diin 46 ka farm-to-market roads ang ipatuman karong tuiga sa lain-laing probinsya sa Region 10 aron mapadali ang pagdala sa produkto sa mga mag-uuma padulong sa merkado