Gitan-aw karon sa Department of Agriculture kon DA ang posibilidad nga gamiton ang P10 bilyon nga pondo gikan sa Presidential Assistance to Farmers and Fisherfolk kon PAFF aron madugangan ang fuel subsidy alang sa mga mag-uuma ug mangigisda nga naapektuhan sa padayon nga pagsaka sa presyo sa produktong petrolyo.
Sumala sa pamahayag ni Arnel de Mesa, spokesperson sa DA, gisusi sa ahensya kung mahimo bang gamiton ang kabahin sa maong pondo aron suportahan ang sektor sa agrikultura hilabi na karon nga nagpadayon ang tensyon sa Middle East nga mahimong makapadugang sa presyo sa fuel sa kalibutan.
Sa kasamtangan, adunay P100 milyon nga pondo nga andam ipanghatag sa gobyerno alang sa fuel subsidy, diin P50 milyon ang gikatakdang ipang-apod-apod sa mga rehistradong mag-uuma samtang ang laing P50 milyon alang sa mga mangigisda.
Ang matag kwalipikadong mag-uuma mahimong makadawat og P5,000, samtang ang mga mangigisda mahimong makadawat og P3,000 nga tabang aron makatabang sa gasto sa fuel alang sa farm machinery ug mga baruto sa pagpangisda.