DA, palapdan pa ang P20 matag kilo nga bugas karong tuiga

Gipahibalo sa Department of Agriculture (DA) nga palapdan pa nila karong tuiga ang P20-per-kilo rice program aron mas daghan ang makapahimus niini.

Tumong sa kagamhanan nga moabot sa 15 ka milyon ka panimalay (o dul-an 60 ka milyon ka Pilipino) ang makabenepisyo sa maong programa sa dili pa mahuman ang tuig 2026.

Gigahinan og P23 bilyon ang maong inisyatibo isip subsidy alang sa mga kabus. Matod ni Agriculture Secretary Francisco Tiu Laurel Jr., gikan sa mga 4Ps beneficiaries, PWDs, solo parents, ug mga senior citizens, target nila karon nga maapil na ang mas dako nga bahin sa populasyon.

Apan giklaro sa opisyal nga duna gihapoy purchase limit o limitasyon sa gidaghanon sa mapalit aron maseguro nga sakto ang supply sa bugas alang sa tanan.