Nangandam na ang Department of Agriculture (DA) sa pagpadayon sa pag-import og bugas karong Enero 2026 aron masiguro nga dunay igong suplay ang nasod samtang nagpaabot sa sunod nga ting-ani.
Sumala ni Agriculture Secretary Francisco Tiu Laurel Jr., gikinahanglan ang pag-import og dul-an sa 300,000 metric tons tungod kay gilaumang mahurot na ang kasamtangang imported stocks sa katapusan sa Nobyembre.
Bisan pa niini, plano sa gobyerno nga suspensuhon pag-usab ang importasyon gikan sa Pebrero hangtod Abril. Kini gihimo aron mapanalipdan ang presyo sa humay sa mga lokal nga mag-uuma ug masiguro nga dili sila maalkansi panahon sa ilang ting-ani.
Tumong sa DA nga balansehon ang pagbaton og barato nga bugas alang sa mga konsumidor samtang gitabangan usab ang panginabuhian sa mga mag-uumang Pinoy.