Gisiguro sa Department of Agriculture nga igo ang suplay sa mga produktong agrikultura sa nasud sulod sa sunod nga 90 ka adlaw o hangtod sa bulan sa Hunyo karong tuiga.
Bisan pa sa padayong tensyon sa Middle East ug pagsaka sa presyo sa petrolyo, wala’y dakong isyu nga nakaapekto sa mga nag-unang palaliton lakip na ang bugas.
Sumala kang Francisco Laurel Jr., gilauman nga magpabilin nga lig-on ang suplay bisan hangtod sa bulan sa Hulyo.
Gipasabot sa kalihim nga dako ang stock sa bugas sa National Food Authority, nga duol sa tunga ka milyon ka tonelada.
Dugang pa, kasamtangan karon ang peak harvest season nga molungtad hangtod sa bulan sa Mayo, hinungdan nga mosaka ang produksyon sa humay.
Sa ubang produktong agrikultura sama sa mais, asukar, ug sibuyas, nagpabilin usab nga lig-on ang suplay tungod sa padayong produksiyon.
Samtang sa karne sa baboy, igo gihapon ang suplay gikan sa lokal nga produksyon ug imported stocks nga anaa sa cold storage.