Gimando sa Department of Agriculture (DA) ang temporaryo nga pagsuspinde sa pag-apod-apod sa abono gikan sa lima ka supplier human makadawat og mga reklamo mahitungod sa kalidad sa mga produkto.
Sumala ni Agriculture Secretary Francisco Tiu Laurel Jr., nagpahigayon na og imbestigasyon ang ahensya batok sa mga kompanya nga adunay kontrata sa kagamhanan.
Makigtambayayong usab ang DA sa Fertilizer and Pesticide Authority (FPA) aron susihon kung kwalipikado ba sa sukdanan o standards sa gobyerno ang mga gihatag nga abono.
Ubos sa maong direktiba, gipa-freeze una ang tanang stocks sa abono gikan sa mga nahisgutang supplier hangtod nga mahatagan og clearance gikan sa Office of the Secretary.
Samtang, gimandoan usab ang tanang kawani sa DA nga mosumite og report bahin sa mga nahabilin nga kasamtangang mga transaksyon, ug uban pang dokumento aron mapadali ang pagsusi.